পুৱারী
ইম্ফাল ইষ্ট দিষ্ট্রিক অসি কুমজা ১৯৯৬কী অগষ্টগী তাং ৩০ দা মণিপুর সরকারগী ওর্দর নম্বর ৬/১/৭৩-আর( VIII) অসিগী মতুং ইন্না মতম অদুগী হান্নগী ইম্ফাল দিষ্ট্রিক অদু ইম্ফাল ইষ্ট অমসুং ইম্ফাল ৱেষ্ট দিষ্ট্রিক হায়না অনি থোক্না খায়দোকতুনা মমিং থোনখি অমদি ইম্ফাল দিষ্ট্রিক্কী নোংপোক থংবা শরুক্না কোনবা লমশিংবু ইম্ফাল ইষ্ট দিষ্ট্রিক হায়না খঙনখি অদুগা মসিগী হেদ ক্ৱাতরনা পোরোমপাৎতা লৈখি।
ইম্ফাল ইষ্ট দিষ্ট্রিক শেমখিবগী ৱারী অসি মণিপুর ইতিহাস পুৱারীগা মতম চুপ্পদা তৎন-থানাবা য়াদনা লৈরগদবা শরুক অমনি। হৌজিক্কী ইম্ফাল ইষ্ট দিষ্ট্রিক য়াওনা লৈরিবা ইম্ফাল হায়বসি মণিপুরগী কোনুং ওইবতা নত্তনা মমাংঙৈদগী হৌনা মণিপুরদা পানখিবা ইনিংথৌশিং ( নিংথৌশিং) গী কোনুংসু ওইরকখিবনি। মায়কৈ পুম্নমক্তা চীংনা ইকোয় কোয়শিনবা লৈহাও য়াম্না লৈবা লৈতেম মান্নবা থেল তম্পাক্কী লম অসিদা লৈবা পাম্বদগী মণিপুরগী অকোইবদা অথাপ্পা অমসুং অনকপদা লৈরিবা মীতোপশিংনা মফম অসিদা লাকতুনা লৈবা পাম্লম্মী, মরম অসিনা চঙশিল্লকইবা মীতোপশিং অদুগা লম অসিগী লৈজরিবা মীশিংগগী মরক্তা মুক্নবগী, অঙম তান্নবগী লান তোইনা থোক্নখি, অদুতসু নত্তনা লৈঙাকপাশিংগী মরক্তসু লান শোক্নখি। মণিপুরগী হৌজিক কোনুং ওইরিবা ইম্ফাল অসি মতৌ করম্না থোনখিবনো কৌখিবনো হায়বগী মরম মণিপুরগী পুৱারীদা অইবা ওইনা ইদুনা য়াওরমদে। মতম অদুদা মফম অসিদা ফজ-ফজবা লৈননবা য়ুম ময়াম অমা পুল্লপ পুল্লপ পুন্না লৈরম্মী হায়বদগী ইম্ফাল হায়বা ৱাহৈ অসি ‘য়ুম’ অমসুং ‘ফাল’ হায়বা তোঙান তোঙানবা খোন্থোক্কী ৱাহৈ অনি অসিনা পুনশিল্লগা শেমখিবা মাল্লি হায়নৈ হায়বদি “য়ুম” হায়বসিনা লৈননবা শঙ অদুগা “ফাল” হায়বসিনা মরাঙ কায়বা নত্রগা ফজবা হায়বা ৱাহৈ অসি “ইম” নত্রগা য়ুম নত্রগা য়োম হায়না উৎচরোন তৌই। মরম অসিনা ইম্ফাল হায়বসি মরক মরক্তা য়ুম্ফাল হায়না উৎচরোন তৌরকপকাসু য়াওনৈ। মণিপুরগী ইতিহাকারী ইতিহাস ইবা মীশিংনা অঙনবা মতমদগী ৱাফম অসিগী মতাঙদা অচুম্বা অমা পুথোক্নবা কন্না হোৎনৈ অদুবু মখোয় মশেলগী মরক্তা অমত্তা ওইবা ৱারেপ মত পুরকপদি ঙমদে।
মণিপুর অসি কুমজা ১৯৪৯ গী ওক্টোবর তাং ১৫ দা ইন্দিয়াগী মনুংদা দিষ্ট্রিক পার্ট “সি” ষ্টেট অমা ওইনা য়াওদুনা ভারত সরকারগী লৈঙাক মনুংদা চিফ কম্মিস্নর অমগী খুথাংদা সাসন তৌরকখি। দিষ্ট্রিক অসি সব-দিষ্ট্রিক ১০ থোক্না খাইদোকখি, ৬ অমনা চিংদা, ৪ অমনা তম্পাক্তা লৈখি। মখোয়শিং অদুদি ইম্ফাল ৱেষ্ট, ইম্ফাল ইষ্ট, বিশেনপুর, থৌবাল, উখ্রূল, মাও অমসুং সদর হিলস, তামেংলোং, জিরিবাম, চুরচান্দপুর অমসুং তেংনৌপল অসিনি। নভেম্বর ১৯৬৯ দা মণিপুর অসি দিষ্ট্রিক ৫ থোক্না অমুক খাইদোকখি। মণিপুর সেন্ট্রেল ডিষ্ট্রিক অসি মী কুংনা তাবা মরম্না লৈঙাক্কী খুদোং চানবগীদমক্তা ১৯৮৩ গী মে থাদা অমুক হন্না ডিষ্ট্রিক ৩(অহুম) থোক্না খাইদোকখি মখোয়শিংদুদি ইম্ফাল ডিষ্ট্রিক, থৌবাল ডিষ্ট্রিক অমসুং বিশেনপুর ডিষ্ট্রিকনি। জানুৱারী ১৯৮৮ তা ইম্ফাল ইষ্ট সব-দিবিজনবু সব-দিবিজন অনিথোকনা হাইবদি ইম্ফাল ইষ্ট-১ অমসুং ইম্ফাল ইষ্ট-২, ইম্ফাল ৱেষ্ট সব-দিবিজনবুনা ইম্ফাল ৱেষ্ট -১ অমসুং ইম্ফাল ৱেষ্ট-২ সব-দিবিজন হায়না খায়দোকখি। হৌজিক লৈরিবা ইম্ফাল ইষ্ট অমসুং ইম্ফাল ৱেষ্ট অসি মমাংদা লৈরম্বা ইম্ফাল ডিষ্ট্রিকপু মণিপুর সরকারগী ওর্দর নং ৬/১/৭৩-আর(VIII) ওগষ্টকী তারিখ ৩০, ১৯৯৬ না ডিষ্ট্রিক অনি থোকনা খাইদোকতুনা ওইখিবনি লোইননা জিরিবাম সব-ডিবিজনবুনা ইম্ফাল ইষ্ট ডিষ্ট্রিক্তা য়াওহল্লমখি। হন্দক্তা মণিপুর সরকারগী ওর্দর নং ১৬/২০/২০১৬-আর ডিসেম্বর তারিখ ৮, ২০১৬ না ইম্ফাল ইষ্ট ডিষ্ট্রিক্তগী জিরিবাম ডিষ্ট্রিকপু খাইদোকখি।